Bir asırlıq sükünetten soñ Şükürullah efendi camisinde kene ezan oquldı (FOTO) - ЦРО ДУМКЦРО ДУМК

Вторник

15

июня

5
Зуль-къаде
1442 | 2021
Утр.2:49
Вос.4:46
Обед.12:49
Пол.16:53
Веч.20:41
Ноч.22:38
Времена намазов
Календарь 2021г

Намаз

Bir asırlıq sükünetten soñ Şükürullah efendi camisinde kene ezan oquldı (FOTO)

Опубликовано:

Kezlevdeki dervişler tekiyesi yanında yerleşken camiden, 97 yıl devam etken sukünetten soñ, 2021 sene, mayıs 21 künü kene ezan sesi musulmanlarnı cuma namazına çağırdı.

Cuma namazına 20 yaqın insan keldi. Namaznı Qırım MDİ imamı Nariman Mamedaliyev keçirdi.

Qırım musulmanları içün bu büyük vaqia! Kezlev bölgesiniñ baş imamı Eskender Memetovnıñ bildirgenine köre, Şükürullah efendi camisinden ezannı eşitken musulmanlar başta buña inanmadı, amma soñ aşıqıp, büyük quvançnen camige kelip, namazğa qoşuldılar.

“Bugün cuma namazına yigirmi insan keldi. Eminim ki, cami çalışqanı er kes içün belli olğan soñ, mında kelgen musulmanlarnıñ sayısı ep artacaq”, – dep, eminliknen bildirdi Eskender Memetov. Bundan da ğayrı, o, hatırlattı ki, külliyede Quran ve İslâm temelleri dersleri keçirile.

Cuma namazından soñ müminler bayram çayı içün toplandılar. “Kiçik Qudüs” (“Malıy İyerusalim”) etnografik merkeziniñ müdiri Radik İsâkayev musulmanlarnı bu müim künnen hayırlap, namazlıq ve tekiyeni ediye etti.

Şükürullah efendi camisi XVII asırda qurulıp, 1924 senesine qadar çalıştı. Bundan soñ, aman-aman bir asırğa qadar işi toqtatıldı. Endiden soñ ise, Şükürullah efendi camisiniñ qapıları musulmanlar içün açıq olacaq.

Binanıñ yanında yerleşken minareniñ boyu 27 metr. O, yerli taş ocaqlarında kesilgen kireç taşlarından quruldı. Evelden minareniñ damı qurşunnen qaplı edi, üstünde de alemi bar edi. Camide cuma namazları keçirile edi, içi işlemli dülber kilimlernen töşeli edi.

1924 senesi dervişler tekiyesi ve etraftaki saa Qara deñiz flotunıñ mülkine keçirildi, o da mında öz anbarlarını yerleştirdi. Tek 2000 senesi külliye kene din cemiyetine qaytarıldı.

2021 senesi dervişler tekiyesi ve cami Qırım Cumhuriyeti ve Sevastopol şeeri musulmanları diniy idaresiniñ esabına keçirildi. Al-ı azırda diniy külliyeniñ ğayrıdan tiklenilmesi içün işler alıp barıla. Endiden başlap, külliyeniñ qapıları Kezlev şeeriniñ musulmanları ve musafirleri içün açıq olacaq!

Qırım MDİ matbuat hızmeti