Aqyar civarındaki Baydar köyünde cami qurulacaq (FOTO) - ЦРО ДУМКЦРО ДУМК

Среда

30

сентября

12
Сефер 
1442 | 2020
Утр.5:14
Вос.6:30
Обед.12:38
Пол.15:49
Веч.18:35
Ноч.19:51
Времена намазов
Календари 2020г

Намаз

Aqyar civarındaki Baydar köyünde cami qurulacaq (FOTO)

Опубликовано:

Qırım Müftisiniñ muavini Esadullah Bairov, Örlinoye münitsipal ortağında yerleşken Aqyar civarındaki Baydar köyünde cami qurulacaq yerde temel taşınıñ qoyuluvınen bağlı tantanalı merasimde iştirak etti.

Temel taşınıñ qoyuluvınen bağlı tedbirde –  gübernator muavini Andrey Şişkin, Aqyar şeerindeki qanun çıqarıcı şurasınıñ reisi Yekaterina Altabayeva, Devlet Dumasınıñ deputatı Ruslan Balbek, Aqyar parlamentiniñ deputatı Vâçeslav Aksenov, Aqyar memuriyeti ve şeerniñ ananeviy din vekilleri iştirak etti.

Tedbirniñ itibarlı musafirleri arasında islâm biznesi Halqara Birleşmesiniñ Prezidenti Marat Kabayev ve Birleşmeniñ Qırım bölüginiñ Başı Ramil Ahmerov bulundı.

Selâmlav sözlerinde Esadullah Bairov, qurucılıqnı başlamaq içün kerekli vesiqalarnı resmiyleştirmege yardım etken er keske teşekkürler bildirdi. Bundan da ğayrı, Müfti muavini, köy sakinlerini ve tedbir musafirlerini, Baydar musulmanları aman-aman 30 yıl devamında beklegen bu müim vaqia ile hayırladı.

Esadullah Bairov: “Bu künge yetmek içün uzun yoldan keçtik. Allah, bu işni soñuna qadar yekünlemege yardım etsin, bu meydanda musulmanlarnı birleştirecek cami qurulsın. Er birimiz, kim olğanımıznı, bu dünyağa kelgenimizniñ maqsadı ne olğanını, kim olacağımıznı ve ileride bizni ne beklegenini tüşünmek kerekmiz. Bunıñ episi er birimizge, milletimizniñ ve, umumen, Qırımnıñ yaşayışında din, siyaset ve medeniyet saasındaki faalligimiznen bağlıdır”, – dep ayttı.

Müfti muavini, yerli sakinlerni, yerli din cemiyetine qurucılıq işlerinde destek köstermege çağırdı ve: “İnşallah, qurulacaq cami cemaatnen tolu olsun. Unutmañız ki, cami tek imamnıñ degil de, bütün milletimizniñ emanetidir. Camige kelseñiz, balalarıñız, torunlarıñız da kelecek. O zaman cami fayda ketirecek”, – dep ilâve etti.

Nutuğında Esadullah Bairov, Qırım, bütün tarihı boyunca, Rusiye Federatsiyasınıñ regionları arasında farqlı din ve millet vekilleri arasında güzel, barışıq, dostane munasebetlernen ayırılıp turğanını  qayd etti ve: “Ecdatlarımız qaldırğan büyük tecribemiz bar ve bu tecribeni balalarımız da menimsey, inşallah, ileride de öyle olacaq”, — dep ayttı.

Kelecek caminiñ yerinde Müfti muavini musulmanlar içün cuma namazını keçirdi.

Qurucılıq meydanı – 25 ga topraqta yerleşecek. Cami birden 250 insannı sığdırabilecek ve eki qat basamağından,  qadınlar ve erkekler içün ibadet bölüklerinden, abdesthaneden ve minareden ibaret olacaq. Leyha boyunc bina, ananeviy usulda, kiramet damınen yapılıp, milliy örneklernen bezetilgendir. Cami sadaqa paralarına qurulacaq. İnşaat içün 15 mln civarında para lâzimdir. Bugünki künde din cemiyetiniñ qollarında 900 biñ ruble miqdarıda sadaqa paraları bar. Musulmanlarğa yardımnı, RF Devlet Dumasınıñ deputatı Ruslan Balbek, İslâm biznesi Halqara birleşmesiniñ Prezidenti Marat Kabayev ve Birleşmeniñ Qırım bölüginiñ Başı Ramil Ahmerov destek kösterdiler.

İşni bir yarım yıl içinde yekünlemege planlaştıralar.

“Avdet” yerli musulman teşkilâtınıñ vekilleri, Baydar ve etraftaki köylerniñ sakinleri içün bayram teşkil etti. Musafirler ögünde oyun taqımı  qırımtatar milliy oyunını icra etti. Bayram olıp keçti. İleride ise qurucılıqnıñ birinci basamağıdır.

QMDİ matbuat hızmeti