Aqmescitte yazıcı, jurnalist, terciman Zakir Qurnezirniñ hatıra aqşamı keçirildi (FOTO) - ЦРО ДУМКЦРО ДУМК

Пятница

10

апреля

17
Шабан
1441 | 2020
Утр.4:34
Вос.5:56
Обед.12:49
Пол.16:27
Веч.19:32
Ноч.20:54
Времена намазов
Календари 2020г

Намаз

Aqmescitte yazıcı, jurnalist, terciman Zakir Qurnezirniñ hatıra aqşamı keçirildi (FOTO)

Опубликовано:

Qırım Müftisiniñ muavini Ayder İsmailov qırımtatar yazıcısı, terciman, jurnalist Zakir Qurtnezirniñ 85-yıllığına bağışlanğan “Yazıcınıñ halqına yapqan hızmeti” hatıra aqşamında iştirak etti. Hatıra aqşamı Aqmescitte Cümhuriyet İ.Gasprinskiy adına qırımtatar kitaphanesinde olıp keçti.

Bundan da ğayrı, tedbirde yazıcınıñ tuvğanları, qırımtatar yazıcılar Birliginiñ azaları, filologlar, tarihçılar, jurnalistler, İ.Gasprinskiy adına Mediamerkezniñ vekilleri, cemaat teşkilâtlarınıñ azaları, ocalar ve Aqmescit aliy oquv yurtlarınıñ studentleri iştirak etti.

Tedbirniñ başında Ayder İsmalov dua oqudı. O, Zakir Qurtnezir ile birlikte Qırım müsulmanları Diniy idaresiniñ içtimaiy-diniy “Hidayet” gazetası üzerinde çalışqanları aqqında hatırlavlarınen paylaştı. Ayder İsmailov: “Zakir Qurtnezir pek meraqlı insan edi. O, bizni em jurnalistika, em de tilşinaslıq saasındaki bir çoq şeyge ögretti. O, bir çoq meraqlı insanlarnen dostlaşıp, olar ile körüşüvler, subetler keçirgen edi. Zakir ağa farqlı, atta diniy mevzularda eserlerni yazıp, edebiyatnıñ inkişafına büyük isse qoştı. Onıñ eñ büyük işlerinden biri – Qurannıñ qırımtatar tiline tercime etmesi oldı. Bu, kerçekten de, büyük iş ve onı yapmaq içün Zakir ağa çoq vaqıt sarf etti. Qurannı qollarına alğan ve onı ana tilimizde oquğan er kes Zakir ağağa minetdarlığını bildire”, – dep ayttı.

Aqşam devamında Zakir Kurtnezirniñ dostları, jurnalistika saasında çalışqan işdeşleri tarafından da hatırlavlar  yañğıradı. Tedbir teşkilâtçılarınıñ sözlerine köre, kitaphanede Zakir Qurtnezirniñ işleri bar, amma aynı zamanda kitaphane hadimleri onıñ aqqında malümat toplamaqnı devam ete.

Kitaphanede: “İnsandan soñ, bu dünyada tek onıñ işleri qala. Zakir Qurnezir kendisiniñ artında büyük, qıymetli, unikal miras qaldırdı. O, bir çoq adamlarnen çalıştı, işbirlik etti, dostlaştı, bu büyük insan aqqında hatıralarnı qaldıracaq er şeyni qabul etmege azırmız”, – dep ayttılar.

Malümat: Zakir Qurnezir dekabr 2 künü 1933 senesi Varnutka köyünde dünyağa keldi (şimdi Balaklava rayonınıñ Gonçarnoye köyü). Namangan pedagogik institutınıñ fizika-matematika fakülteti, Taşkent devlet universitetiniñ jurnalistika fakültetini yekünledi. Özbek tilinde yazılğan onıñ ilk şiirleri özbek gazetasında bastırılğan edi. 1957 senesi “Lenin bayrağı” qırımtatar gazetası çalışıp başlağan soñ, o, daimiy sürette gazetada tuvğan tilinde şiirlerini bastırmağa başladı. Bir sıra ebediy eserler “Yıldız” jurnalında em evel,em al-azırda da derc etilmekte.

Yıllar devamında Zakir Qurnezir Qırım müsulmanları Diniy idaresiniñ neşir etüv bölüginde reberlik etti, “Hidayet” gazetasınıñ baş muarriri edi. Zakir ağa bir sıra kitaplarnıñ müellifidir (“Muhammed aleyhisselâmnıñ ahlâqı ve adetleri”, “Dünya kezdim — neler-neler kördim”, “Hastalarğa şifa, dertlilerge deva”, “Vatan yolu otaymadı” ve digerleri). Sovetler Birligi yazıcılar Birliginiñ azası edi (1978 s.).

QMDİ matbuat hızmeti