Aqmescitte Bütünqırım Quran bayramı olıp keçti! (FOTO) - ЦРО ДУМКЦРО ДУМК

Среда

27

октября

21
Ребиу'ль-эвель
1443 | 2021
Утр.5:48
Вос.7:05
Обед.12:32
Пол.15:13
Веч.17:48
Ноч.19:06
Времена намазов
Календарь 2021г

Намаз

Aqmescitte Bütünqırım Quran bayramı olıp keçti! (FOTO)

Опубликовано:

Aqmescitte balalar arasında eñ güzel Quran oquyıcısı yarışı olıp keçti. Tedbirniñ teşkilâtçısı – Qırım musulmanları diniy idaresiniñ “Faydalı ilim” diniy-maarif leyhasıdır.

Qırım Müftisi hacı Emirali Ablayev adından iştirakçilerni Müfti muavini Esadullah Bairov hayırladı. O, qayd etti ki, yarışnıñ er bir iştirakçisi kiçik qaramandır.

“Ramazan – Quran ayıdır! Biz yarışnı keçirmek içün bu aynı boşuna saylamadıq. Rabbimiz iştirakçilerge yardımcı olsun, bayram epimizge hayırlı olsun”, – dedi Esadullah Bairov.

Yarışta Qırımnıñ farqlı köşelerinden kelgen 20 bala iştirak etti. Azırlanuv işleri bir qaç ay devam etti.

Yarış üç basamaqtan ibaret oldı: 1) sual-cevap; 2) berilgen Quran ayetlerini oqup, tecvid qaidelerini belgilemek; 3) surelerniñ ezberden oquluvı.

Eki tur neticesinde finalğa 10 iştirakçi çıqtı.

İştirakçilerniñ bilgilerine jüri qıymet kesti, jüri terkibine din ocaları Leylâ Ümerova, Safiye Kurtdede, Siyare Memetova ve Nazife Akimova kirdiler.

Yarış neticesinde ğalipler belgilendi.

III yer – Fatime Kübedinova.

II yer – Hatice Osmanova.

I yer – Reyana Mujdabayeva.

Ğaliplerge bahşışlar ve para sertifikatları berildi, bütün iştirakçiler taqdirnameler ve bahşışlarnen taqdir etildi.

Jüri iştirakçilerniñ yüksek azırlıq seviyesini qayd etti ve ğalip çıqmağanlarğa göñülden tüşmeyip, kelecek seferlerde daa çoq çalışıp, yeñmekni tiledi. Ğaliplerni ve iştirakçilerni “Faydalı ilim” leyhasınıñ rehberi Zeyneb Bairova hayırladı.

“Quran – ecdatlarımız saqlap qorçalağaları eñ qıymetli degerdir. Bugünki yarış ise, epimiz, bütün Qırım içün ğalebedir! Tedbirge destek köstergen, bizge yardım etken er kesge teşekkürler bildirem”, – dedi Zeyneb Bairova.

Bundan da ğayrı, tedbirde çerçivesinde eski Quranlar sergisi olıp keçti, olarnı yarışnıñ iştirakçileri ve musafirleri ketirgen ediler.

“Bu 100 yıllıq Quranlardır. Olarnıñ taqdirleri acayıptır. Muqaddes kitaplar qıyın zamanlarda semetdeşlerimizniñ evlerini qorçalay edi. Halqımız olarnı sürgünlik vaqıtında köz bebekleri kibi saqlay edi, insanlar uzun ve belgisiz yolğa sürüklengende, eñ evelâ, yanlarına Quranlarını alğan ediler. Bugün ise, balalarımız tuvğan topraqlarında Quran oquğanını ve oña ürmet etkenlerini körip, pek quvanamız. Bu uzaq topraqlarda qalğan qartana ve qartbabalarımıznıñ arzusı edi. Bugün ise, olarnıñ arzusı kerçekleşti”, – dep, teessuratlarını ifade etti Zeyneb Bairova.

Bayram çerçivesinde balalar içün farqlı master-klasslar teşkil etildi, olarnı animatorlar eglendirdi. Mahsus bayram içün “Emanet” taqımı eki yañı yırnı azırlap, icra etti.

Qırım MDİ matbuat hızmeti