Aqmescitte bayram namazı olıp keçti (FOTO) - ЦРО ДУМКЦРО ДУМК

Вторник

04

августа

14
Зуль-хидждже
1441 | 2020
Утр.3:47
Вос.5:22
Обед.12:54
Пол.16:49
Веч.20:16
Ноч.21:51
Времена намазов
Календари 2020г

Намаз

Aqmescitte bayram namazı olıp keçti (FOTO)

Опубликовано:

İyün 4 künü saba saat 06:00 Ramazan bayramı namazı olıp keçti.

Aqmescitte bayram namazını Qırım Müftisi hacı Emirali Ablayev keçirdi. Namaz, Zenaat birligi medeniyet evinde olıp keçti. Qırımnıñ çeşit köşelerinden kelgen 3 biñ musulman Aqmescitte toplaştı.

Qırım musulmanlarınıñ maneviy lideri hutbe oqudı. Müfti, musulmanlarnı birlik-beraberlikke, büyüklerge ürmet köstermege ve imannı qaviyleştirmege çağırdı.

Müfti: “Üzerimizde büyük mesüliet bar. Milletimizni saqlap qalmaq, balalarımıznı doğru terbiye etmek içün er kün tasil aqqında tüşünmek kerekmiz. Bilgi, tek bilgi milletimiz içün muvafaqiyetke yol açar. Biz mektepler, bala bağçalarını qurıp, balalarımıznı medeniyetimiz, tuvğan tilimizge ögretmelimiz, o vaqıt halqımıznı az sayılı millet olaraq degil de, ulu, tasilli ve ikmetli halq, dep tanıycaqlar. Bunıñ episi bizim qolumızdadır. Onıñ içün can ağırtuvları, duşmanlıqnı, narazılıqnı unutıñız. Birlik – tuvğan topraqlarımızda muvafaqiyetli kelecekniñ temeli olacaq”, – dep ayttı.

Bundan soñ Müfti bayram namazını keçirdi.

Bayram namazı Qırımnıñ bütün camilerinde olıp keçti. Qırımnıñ merkeziy Kebir camisinde 400 insan toplandı. Mında namaznı Qırım liftisiniñ muavini Ayder İsmailov keçirdi. O, musulmanlarnı bayramnen hayırladı, qorantalarğa muabbetlik, merhametlik, milletimizge birlik, büyüklerge ürmet, muhtaclarğa ve öksüzlerge yardım qolunı uzatmağa tiledi.

Oraza bayramı üç kün qayd etilecek. Bayram künleri esli başlı soy-soplarımıznı, hastalarnı ziyaret etmek, balalarnı tatlılarnen ziyafet etmek, yaqınlarımızğa bahşışlarnı ediye etmek kerektir.

İyünniñ 4 Qırım Cumhuriyetinde raatlıq künü olaraq ilân etildi.

Malümat: İd Al-Fitr (arap tilinde iftar bayramı, qırımtatar tilinde – Oraza bayramı) – musulmanlar içün eñ müim bayramlardan biri (Qurban bayramınen bir sırada). Oraza bayramında afu soramaq, ana-babalarnı ziyaret etmek, sadaqa bermek, mezarlıqlarğa barmaq ve merhum soy-soplarnı añmaq etmek kerektir. Adet üzre, Oraza bayramı üç kün qayd etile. Bu sene o iyün 4-6 künlerine tüşe. Qırım yarımadası ealisiniñ 20% Islâm dinini kütmekte.

QMDİ matbuat hızmeti