Aqmescit civarındaki camide talaqa keçirildi (FOTO) - ЦРО ДУМКЦРО ДУМК

Вторник

04

августа

14
Зуль-хидждже
1441 | 2020
Утр.3:47
Вос.5:22
Обед.12:54
Пол.16:49
Веч.20:16
Ноч.21:51
Времена намазов
Календари 2020г

Намаз

Aqmescit civarındaki camide talaqa keçirildi (FOTO)

Опубликовано:

Qırım müsulmanları Diniy idaresiniñ hadimleri Aqmescit civarındaki Beloye-5 qasabasında qurulğan camide ötkerilgen talaqada iştirak ettiler.  Aqmescit şeer memuriyetiniñ teşebbüsinen teşkil etilgen tedbirde şeer başınıñ muavini İsmet Ablayev iştirak etti. Bundan da ğayrı, talaqağa “Ramadan” adlı yerli musulman cemiyetiniñ azaları ve qasaba sakinleri qoşuldı. Talaqa iştirakçileri cami azbarını, merkeziy kirişini temizlep, qurucılıq çöplerini çıqardılar, caminiñ içini cıyıştırdılar, binanıñ ğarbiy divarı boyu ineyapraqlı tereklerni saçtılar.

QMDİ diniy teşkilâtlar ile alâqa bölüginiñ müdiri, Aqmescit rayonınıñ imamı Raim Ğafarovnıñ sözlerine köre, şeer akimiyeti talaqa keçirilecek yerni saylamağa imkân berdi. Bundan soñ QMDİ temizlev işlerini, Beloye-5 qasabasınıñ din cemiyeti ile birlikte bu camide keçirmege qarar aldı.

“Cami toprağında talaqa keçirmek – savaplı bir iştir. Beloye-5 qasabasınıñ camisi yerli sakinler ve lâqayd qalmağan insanlarnıñ maddiy destegi ile qurula. Daa çoq işler yapılacaq, qurucılıq devam ete. Eminmiz ki, birlikte maqsadımızğa yetermiz ve caminiñ qapuları tek qasaba sakinleri içün degil de, bütün Qırım sakinleri içün açılacaq”, – dep qayd etti Raim Ğafarov.

Talaqa işleriniñ soñunda iştirakçilerge üylelik yemegi ikram etildi. Umumen, tedbirge 100-ge yaqın insan qoşuldı.

QMDİ matbuat hızmeti