Amethan Sultan – Qırım toprağınıñ ğururıdır (FOTO) - ЦРО ДУМКЦРО ДУМК

Среда

23

июня

13
Зуль-къаде
1442 | 2021
Утр.2:49
Вос.4:47
Обед.12:50
Пол.16:55
Веч.20:43
Ноч.22:41
Времена намазов
Календарь 2021г

Намаз

Amethan Sultan – Qırım toprağınıñ ğururıdır (FOTO)

Опубликовано:

Qırım Müftiliginiñ vekilleri Sovetler Birliginiñ eki defa qaramanı, ulu üçüci-sınavcı Amethan Sultan elâk olğanınıñ 48-yıllığına bağışlanğan hatıra tedbirlerinde iştirak ettiler.

Adet üzre, merasim, qaramannıñ şerefine adlandırılğan meydanda olıp keçti. Onıñ hatırasını añmaq içün, Aqmescit şeeri memuriyetiniñ vekilleri, Cumhuriyet akimiyeti ve Qırım paytahtınıñ deputatlar korpusınıñ temsilcileri, bundan da ğayrı, din erbapları, studentler, cemaat faalleri qoşuldı.

Müsulman din erbapları adından Müfti yardımcısı Raim Ğafarov çıqışta bulundı. O, toplanğanlarnı Qırım Müftisi adından selâmladı ve ulu üçüciniñ adı er birimizniñ yüreginde yaşamaq kerekligini qayd etti.

Raim Gafarov: “Amethan Sultan – Qırım toprağınıñ ğururı. Onıñ ömüri yeñişler ile tolu. O, aqiqiy qaraman ve nümünedir. Yazıq ki, degerlikler deñişe, bilhassa, million layklarnı qazanmaq içün, internetke fotolarını yüklegen yaşlar, şu arada öz ömürlerini qurban etken ve millionlarnen adamlarnıñ ayatını qurtarğan qaramanlar aqqında unutalar. Bugün epimiz, bizge barışıqnı  bağışlağan qaramanlar içün Rabbige şükür etemiz. Bizim balalarımız qaramanlarımıznı unutmasın ve er vaqıt hatırlasın”, – dep ayttı ve añuv duasını oqudı.

Tedbirniñ soñunda merasimniñ iştirakçileri Sovetler Birliginiñ eki defa qaramanı Amethan Sultannıñ hatıra tahtası yanına çeçeklerni qoydılar.

Bundan da ğayrı, tedbirler Alupkadaki Amethan Sultannıñ hatıra müzeyinde olıp keçti.

Malümat: Bu kün, 48 yıl evel, Tu-16 uçqan laboratoriyasında yañı reaktiv köçüricini sınamaq maqsadınen keçirilgen uçuvda Sovetler Birliginiñ eki defa qaramanı, ulu üçüci Amethan Sultan elâk oldı.

Ulu Vatan cenki devamında meşur üçüci 603 cenkâver uçuv ve 150 ava uruşını keçirdi, şahsen özü ve taqım ile birlikte duşmannıñ 49 uçağını urıp yıqtı, şu cümleden, 6 uçaq Qırım semasında  yıqtırıldı.

QMDİ matbuat hızmeti