Вторник

17

сентября

18
Аль - Мухаррам
1441 | 2019
Утр.4:56
Вос.6:14
Обед.12:43
Пол.16:07
Веч.19:01
Ноч.20:19
Времена намазов
Календари 2019г

Намаз

Neşirler Galereya

Qırımnı ilk sefer İyerusalim ve Palestina Müftisi ziyaret etti (FOTO)

Опубликовано: 18 April, 2019

Qırım Müftisi haci Emirali Ablayev, Qırım Cumhuriyetiniñ Başı Sergey Aksönov, Rusiye Müftiler Keñeşiniñ Reisi Müfti Şeyh Ravil Gaynutdin ve İyerusalim ve Palestinanıñ Baş Müftisi Muhammad Huseyn ile körüşüvde iştirak etti.

Körüşüv, V Yalta iqtisadiy Forumı çerçivesinde olıp keçti. Körüşüv devamında Rusiye Müftileri Keñeşiniñ Reisi, Qırım Başı Sergey Aksönovğa Cuma caminiñ qurucılığı içün teşekkürler bildirdi.

Rusiye Müftileri Keñeşiniñ Reisi: “Qırım müsulmanlarına ayırğan diqqatıñız içün büyük teşekkürler bildirem. Biz, Müfti hacı Emirali Ablayevnen birlikte Aqmescitteki Cuma caminiñ inşaatı yerini ziyaret ettik. Qurucılıqnı nezaret etkeniñiz ve idare etkeniñiz içün, çoq sağ oluñız”, – dep ayttı.

Sergey Aksönov ise, öz nevbetinde, diniy liderlerniñ, milletlerara ve dinlerara munasebetlerine isse qoşqanları içün büyük  sayğı muammelesinde bulunğanını ve ananeviy İslâm – Qırımnıñ maneviy mirasınıñ ayırılmaz parçası ve Rusiye medeniyeti kodınıñ temeli olğanını qayd etti.

Qırım Başı: “Qırım müsulmanları, Cümhuriyetniñ iqtisadiy ve medeniy inkişafına büyük issesini qoşalar. Prezidentimiz Vladimir Vladimiroviç Putin sayesinde regionda ve, umumen, Rusiyede dinlerara ve milletlerara barışıqqa büyük diqqat ayırıla. Bu temel olmadan müsbet inkişaf, iqtisadiy deñişmeler olmaz. Maneviy liderlerge forumda iştirak etkenleri içün teşekkürler bildirem”, – dep ayttı.

Bundan da ğayrı, tedbir çerçivesinde İyerusalim ve Palestinanıñ Baş Müftisi Muhammad Huseyn, Palestina Prezidenti Mahmud Abbasnıñ selâmlarını bildirdi ve: “Qırım Rusiyeniñ yetekçi regionlarından biridir. Mında müsulman infrastrukturasınıñ inkişafı körüne. Rusiye, hususan, Qırımda bulunıp biz köremiz ki, müsulmanlarnıñ aqları diger din vekillerinen musaviy bir şekilde amelge keçirile. Forumğa davetiñiz içün çoq sağ oluñız. Bu rus-arap munasebetleriniñ qaviyleşmesine siltem olur”, – dep ayttı.

Öz nevbetinde, Qırım Müftisi hacı Emirali Ablayev, Qırım müsulmanlarınıñ yaşayışları aqqında ikâye eterek, Qırım Cümhuriyetinde, milletlerara ve dinlerara munasebetler ep qaviyleşkenini qayd eti. Qırım müsulmanlarınıñ inkişafı ve diniy ihtiyaclarını yerine ketirmek içün, kerekli şaraitler bar, yarımadada islâm dininiñ inkişafı ve islâm medeniyetiniñ saqlanıluvı içün işler alıp barıla.

Malümat:

Yalta halqara iqtisadiy forumı – iqtisadiyat saasında er yıl keçirilgen tedbirdir. Forumnıñ teşkilâtçıları: Qırım Cümhuriyetiniñ Ükümeti, Rusiye Prezidenti Memuriyetiniñ destegi ile “Yalta halqara iqtisadiy Forumı” Fondu.

V Yalta Halqara iqtisadiy forumı Qırımda, aprel 17-20 künleri keçirildi. Forumnıñ baş mevzusı: “Barışıq. Rusiye. Qırım. Yañı devir”. Forum programması boyunca 40 tematik toplaşuvlar, eki plenar toplaşuv , “Sanktsiyalar dünyası. Global talaplar” konferentsiyasınıñ keçirilüvi közde tutula. YAMEF işinde 3 biñ insan iştirak ete, şu cümleden, siyasetçiler, bütün dünyadan kelgen ekspert birleşmesiniñ vekilleridir.

 QMDİ MDT (Malümat İDARESİ VE Qırım Cumhuriyeti Başınıñ matbuat merkeziniñ malümatına esaslanıp)