Вторник

17

июля

4
Зуль - къада
1439 | 2018
Утр.3:15
Вос.5:02
Обед.12:54
Пол.16:56
Веч.20:35
Ноч.22:23
Времена намазов
Календари 2018г

Намаз

Neşirler Galereya

Qırım Müftisi hacı Emirali Ablayev bayram namazını keçirdi (FOTO)

Опубликовано: 15 June, 2018

Bugün, iyünni 15-nde, saba saat 05:31 bütün Qırım camilerinde Ramazan ayınıñ soñu ve Oraza bayramı kelgenine bağışlanğan bayram namazı ötkerildi. Bayram namazını Qırım Müftisi hacı Emirali Ablayev keçirdi. Kütleviy namaz medeniyet ve zenaat birligi Sarayınıñ zalında olıp keçti. Qırımnıñ çeşit köşelerinden kelgen 2 biñden ziyade insan Aqmescitte toplaştı. Yarımadanıñ uzaq rayonlarında yaşağanlar bayram namazına kelmege yetiştirmek içün, saba erte turıp, yolğa çıqtılar.
Qırım Müftisi hacı Emirali Ablayev müsulmanlarnı büyük bayramnen hayırlap, barışıq, tınçlıq ve qorantalarda amanlıq olmasını tiledi.

“Bu birlik bayramı, can ağırtıları unutılsın, araları bozuq olğanları barışsın, ayırılıqta olğanları qavuşsın, qartlarımız diqqatsız qalmasın, öksüzler bizim destegimizni duysınlar”, – dep ayttı Müfti.

Bayram namazı Qırımnıñ bütün camilerinde olıp keçti.

Müsulmanlar Oraza bayramını üç kün devamında qayd etecekler. Bu künleri soy-soplar ve hasta olğan yaqınlarımıznı ziyaret etmek, balalarğa tatlı bahşışlar yapmaq kerektir.

Malümat: İd Al-Fitr (qrt. Oraza bayramı) – müsulmanlarnıñ eñ müim bayramlarından biridir (Qurban bayramınen bir sırada). Oraza bayramını qayd etmek adeti Muhammed Peyğaberniñ (s.a.s) zamanında başlana (624 s.). Oraza bayramında afu soramaq, ana-babalarnı ziyaret etmek, sadaqa ya da bahşişlarnı ediye etmek, mezarlıqlarğa barıp, vefat etken soy-soplarnı ziyaret etmek kerektir. Adet üzre Oraza bayramı üç kün qayd etilmekte, bu sene bayram iyün 15-17 künleri olacaqtır. Yarımada ealisiniñ aman-aman 20% İslâm dinini küte.

QMDİ matbuat hızmeti