Пн

23

сентября

24
Аль - Мухаррам
1441 | 2019
Утр.5:04
Вос.6:21
Обед.12:40
Пол.15:59
Веч.18:50
Ноч.20:06
Времена намазов
Календари 2019г

Намаз

Neşirler Galereya

Namaz

Опубликовано: 29 March, 2016

بِسْمِ اللّٰهِ الرَّحْمٰنِ الرَّحِيمِ

حَافِظُواْ عَلَى الصَّلَوَاتِ والصَّلاَةِ الْوُسْطَى
وَقُومُواْ لِلّهِ قَانِتِينَ

Bismillâhi’r-rahmani’r- rahim. Hafizu alâ’s-salâvati ve’s-salâti’l- vusta ve qumu lillâhi qanitin.
Aziz cemaat!
Namaz dinimizniñ diregi, ibadetlerniñ esası ve eñ üstünidir. Pişkinlik vaqtına kelgen ve aqılı yerinde olğan er aqay ve qadın içün mıtlaqa yerine ketirilmesi kerek farzdır. Namaz – salât sözü dua demektir. Bu duanıñ başqa dualardan farqı ve üstünligi büyüktir.

Çünki namaz qılğan kimse tek til ve qollarınen degil, bütün azalarınen Yüce Rabbine yalvara. Namaz Quranı Kerimde doqsandan çoq yerde keçe. Yüce Rabbimiz Quran-ı Kerimde böyle buyura: “Namaz müminlerge belli vaqıtlarğa bağlı olıp, farz qılındı” (Nisa suresi, 103 ayet). Peyğamber Efendimiz (a.s.) Muaz bin Cebelni Yemenge yollağanda, böyle nasiat etti: “Sen ehl-i kitapnıñ diyarına ketesiñ. Olarnı, evvelâ, Allaha qullıq etmelerine davet et! Eger Allahnı qabul etseler, olarğa gece ve kündüz, toplam beş vaqıt namaznıñ farz olğanını ayt! Namaznı qabul etseler, olarğa baylardan alınıp fuqarelerge berilmesi kerek zekât aqqında haber ber! Mallarınıñ eñ yahşısından alma! Çünki zulumğa oğrap, dua etken kimsenen Allah arasında bir mania yoqtır” (Buhariy). Beş vaqıt namaz qılğan kimse er vaqıt küçük günahlardan temizlene. Çünki Peyğamber Efendimiz (a.s.) böyle buyurdı: “Namaz, büyük günahlardan uzaq turulsa, eki namaz arasında yapılğan günahlarğa keffarettir (o günahlarnı sile)” (Müslim). Namaz insannı temizley. Namaz qılğan kimseniñ em urbası, em bedeni, em namaz qılğan yeri, em aqlı ve em de ruhu temiz ola. Keçken günahları silinip, yoq etilgeni kibi, kelecekte de ola bilecek günahlarğa da mania ola bile. Çünki temiz yüreknen ve samimiyetnen yapılğan bu muqaddes ibadet, günahnen beraber yan-yana turmaz. Eger yapqanımız ibadetni samimiy ve yürekten qılsaq, günahlar silinir. Eger de ibadetimiz samimiy ve yürekten olmasa, o vaqıt günahlar kelir, ibadet ise, keter. Yüce Rabbimiz Quran-ı Kerimde böyle buyura: “Saña vahiy etilgen kitapnı oqu ve namaz qıl. Şübesiz, namaz edepsizlikten ve yaramaylıqlardan qorçalar. Eñ büyük ibadet Allahnı añmaqtır. Allah yapqanlarıñızdan haberdardır” (Ankebut suresi, 45 ayet). Rivayet etilgenine köre, ensarlardan yaş bir yigit peyğamber efendimiz (a.s.) arqasında er vaqıt beş vaqıt namazını qıla edi, amma bunen beraber günahlar işley edi. Bu vaziyet Peyğamber efendimizge (a.s.) soraldı. Peyğamber efendimiz (a.s.) olarğa böyle buyurdı: “Onıñ namazı yaqında onı yaramaylıqlardan vazgeçirecek”. Çoq vaqıt keçmedi ve o yigit günahlarından tövbe ette. Namazımıznıñ bizlerge fayda ketirmesi içün, namaznı “huşu ve ihsannen” eda etmek kerekmiz. Yani namaz qılğan vaqıtımızda onıñ er rekâtında oquğan dualarımıznıñ, ayetlerniñ ve zikirlerniñ manalarını terenden tüşünmek kerekmiz. Böyle yapqanımız vaqıt Yüce Rabbimizniñ şu sözü aqqımızda kerçek olur: “Namazlarında huşu içinde olğan müminler qurtulışqa iriştiler” (Müminun suresi, 1-2 ayet). Eger de namaz qılğan vaqıtımızda oquğanımız dua, ayet ve zikirlerniñ manalarını tüşünmesek, qılğanımız namaz bizlerge iç bir fayda ketirmez. Böyle namaz aqqında Yüce Mevlâmız böyle buyura: “Yazıqlar olsun o namaz qılğan kimselerge. Olar namazlarında ğafillerdir (ne yapqanlarını añlamaylar)” (Maun suresi, 4-5 ayet). Er bir musulman qıyamet künü evelâ namazlarından sorulacaq. Eger namazları yerli yerinde olsa, başqa amellerinde qolaylıq kösterilir. Amma namazlarında eksiklik ve yetersizlik olsa, başqa amellerinde de qıyınlıq kösterilir. Hutbemni hutbe başında oquğanım ayetniñ manasınen bitirmege isteyim. “Namazlarğa ve orta namazına devam etiñiz. Allah huzurında samimiylik içinde bulunıñız” (Baqara suresi, 238 ayet).