Пятница

18

октября

19
Сефер 
1441 | 2019
Утр.5:36
Вос.6:52
Обед.12:33
Пол.15:25
Веч.18:04
Ноч.19:20
Времена намазов
Календари 2019г

Намаз

Neşirler Galereya

“İkmet çoqrağı”  – taqdim ete…

Опубликовано: 11 February, 2019

Qırım müsulmanları Diniy İdaresiniñ resmiy neşirlerinden biri olğan “İstoçnik mudrosti” (“İkmet çoqrağı”) mecmuasınıñ nevbetteki  – 37-ci – sanı dünya yüzüni kördi.

Bu sefer esas mevzu – Muhammed Peyğamberge (s.a.v.) nisbeten olğan sevgi ve sayğıdır. “Vraçevatel duş” – “Göñüllerni tedaviylegen”… Bu adnı taşığan maqalede, Peyğamberniñ edebi, merhametligi, insanlarğa nisbeten davranuvı ve sevgisi aqqında ikâye etile. Bundan ğayrı, namazğa bergen emiyeti, İslâm dininiñ eñ ince meseleleriniñ añlatıluvı, Quran-ı Kerimge nisbeten sayğısı kibi meseleler – bir sıra maqalelerniñ mevzuatıdır.

Mezkür mecmuanı eline alğan oquyıcılar, “Muzıka: elâlmı, harammı?” degen sualge cevapnı, müellif Ayder İsmailov ile birlikte tapacaqlar.

Amet oca Aliyevniñ “Añlamlarnıñ tüzetüvi” (“İspravleniye ponâtiy”) adlı lektsiyaları, insanlarnıñ tarafından bazı müim din mevhumları ve ıslaatları qarıştırılıp berilgenine aydınlıq kirsetmek imkân açmaqta.

Tarihçı Öleksa Gayvoronskiy, Salaçıqta yerleşken Zıncırlı medreseniñ peyda oluv ve çalışuv tarihına dair qıymetli malümatlarnı olduqça tavsilâtlı şekilde ifade ete.

“Küneş ve aynıñ tutulması” adisesi yüz bergende, mahsus qılınğan ibadet ya da oqulacaq dua barmı? Bu sualge Raim Ğafarov cevap bere.

Qırım müsulmanları Diniy İdaresiniñ erkânında faaliyet köstergen “Faydalı ilim” maarif leyhasınıñ “Sual-cevap” bölüginde, dünyağa kelgen evlât duası, nişan aqqında ve, bundan ğayrı, “qaza namazı” nedir, onı nasıl etip qılmaq kerek olğanı aqqında söz yürütile.

Psihologik tevsiyeler qısımında ise ilâhiyatçı-psiholog Zeyneb Bairova, insanlar, öz balalığında menimsegen çeşit fikir ve alışqanlıqlar sebebinden peyda olğan problemli meselelerniñ al etüv yollarını İslâm dini noqta-i nazarından talil ete.

Emine oca Asanova, bala içün oyun – yalıñız vaqıt keçirmek ve eglenmek degil, dünyabaqışını şekillendirgen, tecribe qazanmağa yardım etken aqiqiy iş olğanını hatırlata.

Bu ve diger mevzular, Sizge – sayğılı oquyıcılarımız – raatlıq vaqtıñıznı faydalı keçirmege, yañı bilgi ve malümatnı ögrenmege yardım eter.

Hatırlatamız, mecmua 2 ayda bir kere çıqarıla. Din, psihologiya, pedagogika, tarih kibi saalarnı qaplap ala. “İstoçnik mudrosti” (“İkmet çoqrağı”) mecmuasına ve “Hidayet” gazetasına abune etüv devam etmekte. Qırımnıñ er angi bir poçta bölüginde yazılmaq mümkün. Abune indeksleri: “İstoçnik mudrosti” – 68363, “Hidayet” gazetası – 21743.

MDT QMDİ matbuat hızmeti