Пн

23

сентября

24
Аль - Мухаррам
1441 | 2019
Утр.5:04
Вос.6:21
Обед.12:40
Пол.15:59
Веч.18:50
Ноч.20:06
Времена намазов
Календари 2019г

Намаз

Neşirler Galereya

Elvida, Fevzi Yaqubov (FOTO)

Опубликовано: 25 August, 2019

2019 senesi avgustnıñ 25-nde Qırım, Qırım Cumhuriyetiniñ şerefli vatandaşı, Qırım müendislik-pedagogika universitetiniñ prezidenti Fevzi Yaqubov ile vedalaştı. Fevzi Yaqubovnı tanığan yüzlernen insan –  yaqınları, dostları, meslekdeşleri, işdeşleri – toplaştı.

Vedalaşuv, universitet binasında keçirildi.  Cenaze namazını Kebir camide Qırım Müftisi hacı Emirali Ablayev qıldırdı.  Müfti: “Epimiz bu dünyada musafirmiz. Er kesniñ öz künü ve saati bardır. Eñ müimi –   hayatnı deger ve itibar ile yaşamaqtır. Bir insan aqqında ne qadar eyi sözler aytılsa da, onıñ qıymetini  bilmek ve qadirine yetmek, o, daa hayatta olğanda, kerektir. Böyle daqqalar bizge, biri-birimizniñ canını agırtmamaq, aqaretlememek, fitne-fesat yaymamaq, öşek-ğıybet darqatmamaq içün bir nasihat kibidir. Eger yanıñızda diger bir insan aqqında yaramay bir şey aytılsa, sözüñiz ile toqtatıñız. Çünki Allahnıñ ögünde mesülietli olacaqmız…

…Fevzi Yaqubov ömürini halqına bağışladı. Er ameli –  tuvğan halqınıñ inkişafı ve eyiligi oğrunda edi.  Fevzi ağa –itibarlı bir ömür yaşadı. Böyle insan bar olğanından ğurur is etmektemiz.  Bu yanıqnı ailesi, yaqınları ile paylaşamız. Eminim ki, aqıllı-fikirli er insan, bu ğayıpnıñ derecesini yahşı añlay. Çünki  aramızdan, ustaz, ikmetli, sayğılı ve soñki nefesine qadar halqı ile beraber olğan insan ayırıldı”, dep ayttı.

Fevzi Yaqubov,  “Abdal” mezarlığında defn etildi.

Malümat: Fevzi Yaqubov, 1937 s. noyabr 10 künü Çernomorsk (Aq-Meçit) rayonında dünyağa keldi. Özbekistanda, Taşkent şeerindeki politehnik institutnıñ mehanika fakultetinde tasil aldı. Tehnika ilimleri doktorı, Qırım ilimler akademiyasınıñ azası olğan alim, 1993 – 2016 ss. Qırım müendislik-pedagogika universitetiniñ rektorı, 2016 senesinden ise – QMPU prezidenti edi. 2018 senesi, Qırım Cumhuriyetiniñ Devlet Şurası, Fevzi Yaqubovğa, “Qırım Cumhuriyetiniñ şerefli vatandaşı” unvanını berdi.

Fevzi Yaqubov, 2019 senesi avgust 23 künü devamlı hastalıqtan vefat etti.

QMDİ matbuat hızmeti