Вс

20

октября

21
Сефер 
1441 | 2019
Утр.5:39
Вос.6:55
Обед.12:33
Пол.15:22
Веч.18:00
Ноч.19:17
Времена намазов
Календари 2019г

Намаз

Neşirler Galereya

Aqmescitte Qurban bayramı qayd etildi (FOTO)

Опубликовано: 14 August, 2019

Qırım paytahtınıñ, Aqmescit şeeriniñ merkezinde, Trenöv adına raatlıq yerinde üç biñ insan toplandı, insanlar tuvğanları, soy-sopları, dostları ve qomşularınen birlikte bayramnı er kesnen paylaşmaq içün keldiler. Bayram teşkilâtçıları – Qırım ve Sevastopol şeeri musulmanları diniy idaresi, Milletlerara munasebetler ve sürgün etilgen vatandaşlarınıñ işleri boyunca Devlet komiteti ve şeer memuriyetidir.

Qırım musulmanlarını ve bayram musafirlerini Qırım Müftisi hacı Emirali Ablayev hayırladı ve: “Bu – dostluq, sayğı ve biri-birini af etüv bayramıdır. Vatanğa qaytqanımızğa ve diger din ve millet vekillerinen qomşu olıp yaşağanımızğa 30 yıl toldı. Öz tamırlarımızğa, medeniyetimizge ürmet ile yanaşsaq, başqaları da bizge nisbeten ürmetnen davranacaq. İslâm – merhametlik, dostluq ve barışıq dinidir. Balalarımız, torunlarımız ileride de bu qaidelerge riayet etip yaşamaları içün Allahqa dua etem. Bu tedbirni teşkil etken er kesge teşekkürler bildirem. Birlik-beraberlik ve dostluq içinde yaşağanımıznı, er evge merhametlik, bereket, tuvğan topraqta güllemege, Qırım sakinlerine stabillik, dostluq ve biri-birine nisbeten ürmet ile yanaşmağa tileyim”, – dep ayttı.

Bayramnıñ hususiy bir yañılığı – qırımtatar milliy urbalarındaki yaş yigitler oldı. Olar, eski adetke köre, bayram musafirlerine büyük gügümlerdenden şerbet ikram etti. Ayrı meydanda sport yarışları olıp keçti. Farqlı ağırlıq kategoriyalarğa ait küreşçiler bayramnıñ esas bahşışı – qoy içün küreştiler.

Ğalipke bahşış sanada ediye etildi. Qalğan sportçılar kuboklar, vıpleller, hatıra bahşışlarını aldılar. Meydanda büyük yarmalıq çalıştı, mında bayram musafirleri ameliy sanat ve milliy el işlerine ait mahsullarnı alabildiler. Eñ küçük musafirlerni ise animatorlar eglendirdi. Şarqiy yemekleriniñ ustaları, 100 kilo çekimdeki beş büyük qazan pilâv pişirdi ve bayram musafirlerine darqattı.

Bayram devamında musafirler ögünde Qırımtatar yır ve oyun “Haytarma” ansambliniñ artistleri çıqışta bulundı, “Ateş” oyun taqımı oyunlarınen quvandırdı, Halisa Ablayeva, Raziye Seytablayeva ve Ernest Emirasanovnıñ çıqışları er kesni ayrette qaldırdı.

QMDİ matbuat hızmeti