Вторник

21

ноября

3
Рабиуль - авваль
1439 | 2017
Утр.6:18
Вос.7:39
Обед.12:34
Пол.14:49
Веч.17:19
Ноч.18:41
Времена намазов
Календари 2017г

Намаз

Издания Галерея

Фатма бинти Эсед

Опубликовано: 5 Ноябрь, 2017

Фатма бинти Эсед (радыяллаху анха)

 

Пейгъамбер Эфендимиз онынъ акъкъында: «Джебраиль Мелеги манъа: «Бу ханым Дженнетке киреджектир» деп буюрды»,- дегени мубарек бир инсандыр.

Фатма (р.а.) – Пейгъамберимизнинъ киеви олгъан Хазрети Али эфендимизнинъ анасыдыр. Яхшылыкъ япмагъа, оксюз ве фукъарелерни бакъмагъа пек севген, федакяр бир ханымдыр. Чокъ балалары олгъаны ичюн, акъайына буюк къорантасыны бакъмагъа ярдымджы олгъан. Пек зенгин дегиль эдилер. Эбу Талибнынъ бабасы кечинген сонъ, торуны Мухаммедни (с.а.с.) де озь эвине ала. Фатма (р.а.) оны озь эвляды киби севип, оксюз олгъаныны ич ис эттирмеди. Озь балалары беклеп тургъаны вакъыт, башта кучюк Мухаммедни (с.а.с.) ашатып, кийиндирип, сачыны тарай эди. Ана севгисинден махрум этмемеге тырыша эди. Мухаммед (с.а.с.) озь ювасыны къургъандже, эмджеси Эбу Талибнинъ ве енгесининъ эвинде яшады.

Мухаммед (с.а.с.) пейгъамбер олгъан сонъ, мушриклернинъ онъа зарар бермесине пек яна ве оны даима къорчаламагъа тырышкъан. Акъайы Эбу Талибнен берабер оны имае этип, аджыларыны унуттырмагъа чалышкъан. Чокъ кечмеден де, бу юдже даветнинъ тесиринден мусульман олды. Анасы киби севгени бу ханымнынъ мусульман олмасы, Пейгъамберимизни (с.а.с.) пек къувандыргъан эди.

Фатма (р.а.) мусульманларнен берабер Мединеге кочип, Аллах ёлунда бу федакярлыкъны да япты. Мединеге кочькен сонъ, огълу Али Пейгъамберимизнинъ къызы Фатманен эвленди. Онъа да эм аналыкъ япты, эм сырдаш олды. Башкъа бир шерефи де, пейгъамбер къызына къайнана олмакъ  шерефи олды.

Пейгъамберимиз Фатманы (р.а.) даима зиярет этип, гонълюни ала, ярдым эте эди. Онъа «анам» дей эди.

Мухаммед Пейгъамбернинъ (с.а.с.) Мединеге ерлешкенден сонъ, дерт йыл кечти. Бир кунь Пейгъамберимиз (с.а.с.) гъает кедерли эди. Бунынъ себебини сорагъанларгъа: «Бугунь анам вефат этти», деп айтты. Пейгъамберимиз урбасыны чыкъарып, онъа кефин олсун, деп берди. Дженазе намазыны да озю къылдырды. Атта, мезарына кирип бираз ятты. Козьлери яшланды, агълай эди Пейгъамберимиз. Онынъ бу арекети Фатма (р.а.) ичюн бир бахшыш эди. Чюнки, беденининъ тийгени мезар, бир Дженнет багъчасы олгъан. Сонъра да Фатманы (р.а.) мезаргъа къойдылар. Пейгъамберимиз (с.а.с.) къабри башында агълап-агълап дуа этти. Сахабелер сорадылар:

«Эй, Аллахнынъ Пейгъамбери! Биз бу ханымгъа косьтергенинъиз мунасебетни башкъа бир кимсеге косьтергенинъизни корьмедик..?!»

«Чюнки о, меним анам эди. Озь балалары ач олса да, башта мени тойдура эди. Озь балалары эвге кирли олып къайтса, башта мени ювундырып, сачыма гуль суву якъып, тарай эди. О, меним анам эди. Эмджем Эбу Талибден сонъра, бу апайчыкънынъ манъа япкъан яхшылыгъы къадар япкъан кимсени бильмейим. Онъа обир дюньяда Дженнет урбалары кийдирильсин деп, озь урбамны кефин яптым. Мезары кенъ ве раат олсун деп, мезарында яттым».

Къабрине топракъ аткъан сонъ, Пейгъамберимиз (с.а.с.) Аллахкъа бойле ялварды: «Эй, Юдже Мевлям! Онъа мерхамет эт ве оны хайырнен такъдирле! Анамдан сонъ, манъа аналыкъ япты! Озю ач къалып, мени тойдурды. Буны да тек Аллах ризасы ичюн япты. Аллахым! Анам Фатма бинти Эседни багъышла, онынъ мезарыны кенълештир. Меним ве менден эвельки  пейгъамберлернинъ хатыры ичюн, дуамны къабул эт!»

Бираз сонъра да, Пейгъамберимиз (с.а.с.) тебессюмледи ве бойле деди: «Джебраиль мелеги бу ханымнынъ дженнетке киреджеги акъкъында хабер этти! Ве Юдже Аллах онынъ дженазе намазына 70 000 мелекни ёллады. Онынъ дженазе намазыны мелеклер де, сизнен берабер  къылдылар».

Иште, Аллахнынъ Пейгъамберине (с.а.в.) нисбетен урьмет, хызмет ве севгининъ маневий бир бедели не къадар гузельдир! Акъайы мусульман олмады, амма бу ал оны ич токътатмады. О, динине хызмет этип, мусульманларгъа ярдым этип яшады. Аллах бизни Дженнетте бу мубарек ханым иле къомшу этсин! Аминь!

Аллах ондан разы олсун!

Эмине АСАНОВА